परब देवारी मनावय
घर अंगना ला,निक निक सजावय रे संगी
परब देवारी मनावय,परब देवारी मनावय
चार दिन एकतऊहा दिन देवारी ले,
उजरावय घर अंगना ला सुवारी
महतारी मन तारी पीट सुवा नाचय,
जावय घर - घर सबके दुवारी
मोहरी दफड़ा बाजे गुदुम मनला भारी भावय
परब देवारी मनावय, परब देवारी मनावय
उमंग भराये आज सबो के हिरदे मा
नवा कपड़ा अऊ गहना बिसाये
धनतेरस के दिन लक्ष्मी दाई के
जूरमिल सुमर सुमर जस गाये
मंदिर मंदिर घर घर म सूरति दिया जलावय
परब देवारी मनावय, परब देवारी मनावय
गऊरा चौरा मा गऊरी गऊरा के
सुग्घर मिलके बिहाव मढ़ाये
संझौती बेरा घर घर मा जाके
गऊ दाई ला खिचरी खवाये
भाईदूज भाई चारा बर मंडई मातर रचावय
परब देवारी मनावय, परब देवारी मनावय।
रचना-श्रवण साहू
गांव-बरगा जि.-बेमेतरा
मोबा. +918085104647
कोई टिप्पणी नहीं:
एक टिप्पणी भेजें